Қазақстан Республикасы Парламенті Мәжілісінің депутаттары бүгінгі жалпы отырыста «Қазақстан Республикасының кейбір заңнамалық актілеріне ветеринария мәселелері бойынша өзгерістер мен толықтырулар енгізу туралы» заң жобасын бірінші оқылымда мақұлдады. Аталған заң жобасы парламент депутаттарының бастамасы бойынша талқыланды.

«Қазіргі таңда  ветеринариялық паспорттар қағаз түрінде ескі тәсілмен шығарылады, дегенмен мемлекеттік саясаттың басым бағыттарының бірі ақпараттық технологияларды дамыту және кеңінен цифрландыру болып табылады. Ветеринариялық паспорттарды электронды түрде беру туралы ережені заңнамалық тұрғыдан 0арастыру ұсынылады», - деді заң жобасын таныстырған Мәжіліс депутаты Роман Ким.

Бұл ереже ветеринариялық паспорттарды беруді жеңілдетеді және алуды тездетеді, сонымен қатар оларды қатаң тіркеуге мүмкіндік береді және мемлекеттік шығындарды айтарлықтай үнемдейді.

Электрондық ветеринарлық паспорттар туралы ереже барлық мал иелеріне қолданылады. Сонымен бірге интернет жоқ ауылдардың тұрғындары құжаттарды өздерінің ауылдық округтерінің ветеринарлық инспекторларына хабарласу арқылы ала алады.

Сондай-ақ, заң жобасы ветеринариялық-санитариялық бақылау мен қадағалауды жүзеге асыру кезінде фото және бейнежазба мен басқа да техникалық құралдарды пайдалануды қарастырады.

«Ветеринарлық инспекторларды материалдық-техникалық құралдармен жабдықтау  мәселелері талқылау тудырады. Біздің еліміз бүгінде біртұтас еуразиялық нарық шеңберінде жұмыс істейді және бұл жағдай ветеринариялық-санитариялық қауіпсіздікті қамтамасыз етуде үлкен жауапкершілік жүктейді. Сондықтан, біз мемлекеттік ветеринарларға өз жұмысында заманауи техникалық құралдарды, соның ішінде фото және видео жазбаларды қолдануға мүмкіндік беруді ұсынамыз», - деп атап өтті Роман Ким.

Депутаттардың пікірінше, техникалық құралдарды пайдалану сыбайлас жемқорлық компонентін жояды, сонымен қатар ветеринариялық қадағалау мамандарының жұмысын бақылауды қамтамасыз етеді.

Сонымен қатар, заң жобасы Кеден кодексіне түзетулер енгізеді. Олар ЕАЭО кедендік шекарасында кеден органдары, мемлекеттік ветеринариялық-санитариялық инспекторлар мен өсімдіктер карантині жөніндегі мемлекеттік инспекторлар арасындағы өзара іс-қимыл тәртібін реттейді.

«Жалпы, заң жобасында ветеринария саласындағы қызметті одан әрі жетілдіруге бағытталған нормалар қарастырылған», - деп атап өтті депутат.

Ақпарат көзі: https://eldala.kz/kz/novosti/zhivotnovodstvo/3398-v-kazahstane-vnedryat-ehlektronnye-veterinarnye-pasporta